ADEL
ArteDrama Euskal Laborategia (ADEL), arte eszenikoetan euskaraz aritzen garenon topagunea da; aktore, zuzendari, antzerkigile zein antzerkizaleentzat urtero zabaltzen den gunea.
Euskal Herriko arte eszenikoetan murgilduta gaudenon arteko eztabaidak, jakintza eta elkartrukeak sustatzeko asmoarekin, astelehenetik larunbatera, 48 orduz guztira,
6 irakasleren tailerrak prestatu ditugu. Ikastaro guztiak euskaraz izango dira, eta matrikula 500 €koa (lotarako lekua eta otorduak barne).
Laborategi gisa jaiotako esperientzia honetara gonbidatuta zaude!
Jo aldaba hogei aldiz!
Zabaldu diezaiogun atea antzerkiari!
Sartu dadila barrura negar edo barre egin nahi duen oro.
Sufritu eta gozatu.
Munduaz ahaztu, edo munduaz jakin.
Ertz biek eta tartekoak. Denak izango du kabida Aulestin.
Aurtengoan, aipamen berezia egin nahiko genieke urtero hainbeste lagundu ohi digutenez gain, BURDINOLA eta ERABIL enpresek eman diguten babesari. Izan ere, gero eta zailagoa baita oasi honi lehortzen ez uztea.
Apirilaren 21etik 26ra datorrela euskal antzerkia Aulestira!
Mikele Urroz Zabalza
EKINTZA, AKTOREON GILTZA
Antzerkia, narrazio edo olerkitik ezberdintzen duena, ekintza presentea dela da. Publiko baten aurrean egiten dugun ekintza. Eta aktoreon lana, ekintza hori gorpuztea da. Nola lortu irudi edo hitz bat ekintza batean gauzatzea? Nola lortu hitzek gordetzen dituzten irudiak ekintza fisiko bihurtzea? Ba al dago fisikoa ez den beste ekintzarik? Nola lortu paperean idatzita dagoen pertsonaia bati bizia ematea?
Ekintza gure giltza da.
METROKOADROKA
Ainhoa Alberdi
Javier Barandiaran
Oier Guillan
PIZGAILUA
Dokumentua gorputzaren detonante gisa
“Itzulpena” kontzeptu mobilizatzaile gisa eta hitzak irudimenaren zerbitzura jartzea izango dira tailer honen motorra. “Probokazio” ezberdinen bidez, zentzumenak irekitzeko moduak bilatuko ditugu, begirada arintzeko, sorkuntza eszenikorako estrategiak aurkitzeko, materialak sortzeko eta ikerketa-prozesuetan murgiltzeko. Ideia batetik abiatzea edo ideia horretara iristea? Gorputza pentsatu ala pentsamendua gorpuztu?
Garazi Etxaburu Aulestia
GORPUTZA ETA MUGIMENDUA
Ariketa eta jolas ezberdinen bitartez, burua eta gorputzaren arteko konexioa landuko dugu. Modu kontziente baten, gure mugimendu aukera guztiak ikertuko ditugu.
Esperientzia ez da beharrezkoa, gozatzeko gogoa bai.
DEJABU
ANTZERKI ZINEMATUA
Dejabu Konpainiako kideek tailer honetan, bereziki Itzulera azken antzezlanean landutako lengoaia partekatuko dugu ikasleekin. Objektu/txotxongilo antzerkia eta zinema zuzenean batzen dituen antzerki lengoaia, hain zuzen.
Paisaia eta miniaturekin egingo dugu lan, eta nola sortu, kamararen begiradapean, sortzaile bakoitzaren barne mundua islatuko dituen eszenak, eta bereziki unibertso propio bat.
Eskalaren ideiarekin ariko gara jolasean, txikiena eta handiaren arteko talkan, eta horrek sortzen dituen metaforen bila.
Aitzol Iraola
ARROTZAREN EDERTASUNA
Noraino iritsi daiteke gorputz bat? Nola landu presentzia eta adierazmena gorputzetik. Edo nola landu gorputza, presentzia eta adierazmenetik. Gorputz erabilgarri eta iragazkor bat garatuz,
bakoitzaren muga fisiko eta mentalak arakatu nahi dira. Arrotza, arraroa, zatarra eta apurtua den hori ere badelako ederra. Gorputz bakoitzaren arroztasun ederra eta edertasun zatarra ezagutu nahi dudalako.
Ander Lipus
LABIRINTOAN JOLASEAN
Ikastaroan zehar aktorearentzako teknika ezberdinen ezagutzan sakonduko dugu. Alde teknikoak jorratu ondoren alde poetikora pasatuko gara. Inprobisazioak eta ekintza txikien sorkuntzak hartuko dute garrantzia ikastaroaren bigarren partean. Antzerkiaren labirintoan murgiltzeko prest?
